Почитувани граѓани,

Општина Велес ги известува граѓаните дека во тек е изготвувањето на нацрт-програмите за активностите на Општина Велес во 2011 година во областа на:
- образованието,
- културата,
- социјална и здравствена заштита,
- спорт, млади и
- поддршка на НВО секторот.

Сите институции, здруженија на граѓани и поединци кои имаат проекти од поширок интерес на заедницата и конструктивни предлози и идеи за активности што треба да се реализираат во 2011 година, можат да доставуваат свои предлози.

Во рамките на 19-то издание на Меѓународното мото-рели  „Независност 2010“, околу 300 мотоциклисти, на 3-ти септември годинава го донесоа звукот на брзината во Велес. Мотоциклистите ги пречекаа Градоначалникот Горан Петров и претседателот на Советот на Општина Велес , Славчо Чадиев и им посакаа успешно рели низ  Македонија. Велес е првиот град што  го посетија мотоциклистите кои одовде се упатија кон Штип.

Во организација на Општина Велес и Одбојкарскиот клуб „Борец“, на  4-ти и 5-ти септември годинава  Велес ќе биде домаќин на првиот меѓународен турнир во одбојка на песок. „Ова е продолжување на напорите да ги поддржиме спортистите и спортските клубови во традиционалните, но и новите спортски дисциплини“ изјави на прес конференција Градоначалникот Горан Петров кој  го образложи креирањето на игралиштето за одбојка на песок во градскиот парк. „Град кој има долга спортска традиција треба да има и соодветно игралиште за одбојка на песок“ рече Градоначалникот кој навести почеток на нова традиција на меѓународни натпревари во Велес.

На првиот училишен ден од учебната 2010/2011 година, Велес по традиција го исполни џагор и раздвиженост. Разделбите со родителите и првата средба со училишните клупи ги исполнија училиштата со емоции.  Во оваа учебна година во основните училишта во Велес ќе учат вкупно  4939 ученици од кои 539 се првачиња. Во средните училишта  се запишани 3035 ученици од кои 739 во прва година. Градоначалникот Петров на средба со новинарите изрази жалење што во Велес  продолжува трендот на намалување на бројот на ученици кој годинава во основните училишта се намали за 5% . „Токму затоа уште пред два месеци на претседателот на Советот му доставив барање како точка на дневен ред  да ја стави предлог одлуката за спојување на училиштата „Благој Кирков“ и „Џинот“ во еден правен субјект. Верувам дека оваа предлог одлука повторно ќе се најде на дневен ред на некоја од наредните седници.

Во рамките на заложбите за постојано унапредување на состојбите со комуналниот отпад, Општина Велес на регистрираните правни лица кои вршат трговска дејност ќе им додели бесплатна канта за отпадоци од 120 литри.

Во рамките на манифестацијата „Топол културен бран“, Општина Велес Ве поканува на промоција на книгата

„Борци низ прозорци“ од Васил Божикалиев
промотор: Илија Петрушевски

30.08.2010 (понеделник)
време: 19:30 часот
место: Ликовен салон