Во ликовниот салон во Велес, во текот на вчерашниот ден беше отворена изложба на слики на ликовниот уметник Новица Трајковски од Општина Илинден, насловена „Божествен премин”, која градоначалникот Коцевски ја прогласи за отворена.
„На триесет дела, масло на платно се претставени сцени од убавините на македонските стари градби и неимарството на нашите стари мајстори, кои како основен мотив уметникот Трајковски ги зема инспириран од старите камени мостови ширум државата” рече Елица Николова, виш кустос историчар на уметност при ЛУ Народен музеј – Велес.
Новица Трајковски роден 1962 година. Средно уметничко училиште и факултет за ликовна уметност завршува во Скопје во класата на професорите Родољуб Анастасов и Димитар Кондовски. Има остварено над 40 самостојни изложби во земјава и во странство, а учествувал и на поголем број групни изложби и колонии во земјава и во странство . Член е на Друштвото на ликовни уметници и живее и работи како слободен уметник во родното Илинден.
Изложбата ќе биде отворена и достапна за посета на јавноста до 20 септември (петок) 2019 година.
