Во чест на патрониот празник на ООУ „Стојан Бурчевски Буридан“ – Иванковци, делегација на Општина Велес и претставници на училиштето положија свежо цвеќе пред спомен обележјето со неговото име. По тој повод училиштето организира свечен настан со претставата Малиот Петар што ќе се одржи во петок, 29 март, во Големата сала на Општина Велес со почеток во 18.30 часот.
Стојан Бурчевски Буридан е роден во велешкото село Рудник во 1920 година. Тој е организатор и учесник во вооруженото востание од 1941 година. Бил борец а потоа и командир на чета во партизанскиот одред „Димитар Влахов“. Од страна на бугарскиот воен суд, во отсуство бил осуден на смрт. Буридан загинува пеејќи ја песната на Одредот, заедно со група партизани во судир со бугарската војска и полиција.
