Денеска, 15 декември, се одбележува годишнината од раѓањето на учителот и преродбеникот Јордан Хаџи Константинов – Џинот. По тој повод делегации на Општина Велес и на театарот што го носи неговото име положија свежо цвеќе на вечното почивалиште во дворот на црквата Св. Спас.
Џинот е првиот македонски драмски писател и просветител. Роден е во 1821 година на Прцорек, од левата страна на Вардар. Својата учителска дејност ја започнува во 1838 година со воведување на народен македонски јазик во училиштата. Во исто време, прв воведува современ начин на одржување на наставата со нови предмети преку кои учениците освен со знаење се стекнувале и со трговски и занаетчиски вештини. Освен со учителствување, Џинот се занимава и со пишување учебници, го напишал првиот буквар „Таблица перваја“, пишувал статии за весници во Белград, пишувал литературни творби а собирал и народни умотворби. Џинот го напишал и првиот драмски текст со што започнува театарската традиција во Македонија. Во своето училиште работел до крајот на својот живот.
