Со положување цвеќе пред споменикот на Панко Брашнаров, Општина Велес денеска одбележа 140 години од раѓањето на народниот учител и учесник во двата Илиндена. Пред неговиот споменик, во знак на почит и благодарност, букет цвеќе положи делегација на Општина Велес.
Панко Брашнаров е роден во Велес во 1883 година. Учесник е во најзначајните историски моменти во борбата на македонскиот народ за независност и слобода. Од Илинден, Балканските војни, Првата светска војна, па сè до историскиот АСНОМ. Избран е за народен пратеник и претседавач на Првото заседание на АСНОМ и член на АВНОЈ. По неколку години работа во штотуку организираната држава, како приврзаник на ставовите во Резолуцијата на Информбирото, Брашнаров е приведен, прогласен за непријател на власта и испратен на злогласниот остров Голи Оток, Република Хрватска, каде починува на 13 јули 1951 година.
